نبض الصفوة.. أمير عوض يكتب: كجول في الطين
بسم الله الرحمن الرحيم.
هسع الهلال ده مالو؟
استاده مستوي.. و لعيبته مكتملين.. و ادارته متوافقه.
و بعد ده كله انزلق في الطين!
الحي الله و الكاتل الله.
الجماعة بعد ضمنوا الدوري و الفرق بقي خمس نقاط.
ناس محمد عبدالماجد خلو الكتابة عن كجول و مسكوا في نجيلة المريخ.
يا حليلهم.
رمضان امس ذكرني قصة الزول المفلس.
ده كمان قال ليك واحد فلسان و قافله معاه.
يوم زهجان.. جاء ماشي في ميدان لقي طيارة محروقه و الناس مجدعين و دمهم سايل.
قال الحمدلله جبرت و اموري حتزبط.
شاف ليه سيخة قديمة بجغ بيها بطنه و قد بيها عينه الشمال و رقد مع الجماعة منتظر الاسعاف.
شويتين سمع واحد بكورك (استوب.. استوب.. ده منو الدخل مع الكومبارس بتاعين الفيلم).
رمضان كمان الشغل اتلخبط عليه.. و بقي يتكلم عن نمرة ميسي الشالها من الغربال.
رمضان بجغ بطنه ساكت.
اها امس توتي غربلتكم و بجغتكم.
خلي رقم ميسي يبقي ليكم بطولة.
انا خايف المريخ يشيل الممتاز 30 مرة و يخلي خشمك ملح ملح.
لولا التحكيم لغطست توتي كجول في البحر للابد.
الحكم في مباريات الهلال بشيل صفارته و معاها ضربة الجزاء الثابتة.
قبل المباراة تنطلق بكون كتب هدف للهلال احرزه محمد عبدالرحمن من ضربة جزاء!!
الغربال جاب حوالي عشرين هدف من بلنتات الدفرة و الدعم.
علشان كده تحس بيه ما فرحان.
نفسه مكتوم من الدعم البدون مجهود.
الغربال حيعمل رقم قياسي و هو عارف في قرارة نفسه انه ده رقم فالصو.
دهب مغشوش.
علشان كده في القمة الفاتت جدع ليهم الكابتنية في الارض.
الزول زهجان و قرفان من الخنقة العايش فيها دي.
مسكين.. طلع من نادي النزاهة و الشرف و البطولات الجوية و مشي محل الفضايح المحمولة جواً.
نرجع لتوتي.
برهان ـ ولدنا ـ خنق كجول و وقع فيه كفيت.
برهان عارف نمر الورق.
فريق بلعب في الاعمدة الزرقاء فقط.
علي أرض الواقع صفر كبير.
بطولة الممتاز دي ذاتها اصبحت عقدة للهلال.
تاني ما اظن الهلال يشيل الممتاز للابد.
الناس ديل خلاص جاتهم نفسيات.
آخر لاعب شاف الهلال بطل للممتاز علي ما اعتقد انه هو الكابتن و نائبه.
الباقين ديل ناس نطيط ساكت.
لعيبة الهلال زي زولنا الجاي من البلد.
قال ليك ده كمان واحد اول مرة يركب الباص.
مطير عويناته من البلد لحدي قريب مدخل العاصمة.
شويتين بتاع ركشة لاوز للسواق.
الباص اتقلب و زولنا اتدفس في طين المطر.
بعد مراق روح قدر طلع.
لقي قدامه دورية المرور.
الضابط قال ليه (حمدلله علي السلامة انك طلعت سليم من الحادث).
زولنا برّم شنبه و نفض الطين من جلابيته و قال ليه (يعني ده حادث؟ حرّم انا قايل اصلو بكبوهم كدا بعد يصلوا).
لعيبة الهلال شن عرّفهم بالممتاز.
مواسمهم كلها حوادث و كجولة و غطس طين.
المريخ ماشي علي الرابعة.
و العُقدة ماشه تستحكم.
نحن طبعاً لما الفرق يبقي 3 نقاط بنضحك لما نقرب نتفنقل.
اسهل حاجة عندنا نشيل الــ3 نقاط من كجول.
و يا حلاوة لما تكون المباراة شارع اتجاهين.
تغلب كجول و تشيل البطولة.
دي المسارات البنحبها نحن.
من الليلة نتوقع نشوف تغريدة للطاهر تغريدات.
مسكين الايام الفاتت سكت و كان متخيل فريقه حسم الدوري.
يا حليلو.. يكون انصطدم.
غالباً يبدأ السكليب من اليوم.
الله العليم يستحمل الضغط ده.
انا شايف لو غرد.. نحن طوالي نحتفل بالرابعة.
فأل الخير علينا.
اول نائب رئيس تنحصر اعماله كلها في التغريدات و استيراد المواسير.
الزول ده شايت علي وين؟
السوباط عرفناه مريخابي و ولدنا.
الطاهر ده مالو؟
الخدمة البقدمها لينا سوداكال ما بعملها.
المهم يا الطاهر.
من الليلة نشط ارخص باقة نت و ابدأ غرد.
النت بقي غالي ما تبعزق قروشك ساكت.
اوع تمشي اليوتيوب تحاول تحمل اهداف الجزولي.
اقول ليك حاجة.
خش بالنت المجاني.
اكتب تغريدتك و ابقي مارق.
اوع تشوف صورة العقرب الايام دي.
عقروب الايام دي بقدم في موسم استثنائي.
ما شاء الله لا قوة إلا بالله.
تقول لي اقوان ضربات الجزاء.
اهو توتي ـ الصاعد حديثاً ـ كشف زيفها.
و نهمس في اذن لعيبتنا.
جاتكم تارة.. ما تدوها بغاث الطير.
الرابعة حمراء بحول الله.
برغم الظلم و الظروف.
المريخ يتجلي عن الشدائد.
نبضة أخيرة
توته توته.. خلصت الحدوته.