مذيعة النيل الأزرق الحاصلة على الذهبية تبوح للرد كاسل “بالبلدي”
مذيعة النيل الأزرق الحاصلة على الذهبية تبوح للرد كاسل “بالبلدي”
“بالبلدي” هكذا يخاطبها الجميع ودون شعور تجدها تلتفت وهي تقول نعم..
هكذا هي شهرتها حيث برنامجها (بالبلدي) انها واحدة من جميلات بلادي حيث الطبيعة، والصفاء، والنقاء ومعدنها الاصيل بت كالنيل تجذبك اليها بتلقائيتها وبسمتها المطبوعة علي وجهها الحديث معها ذو شجون والاستماع لها ممتع ، الرد كاسل حاورت مذيعة برنامج بالبلدي فكانت عزتنا بعزة كما تعودنا عليها هي هي بطبيعتها الخلابة……
* البطاقة الشخصية من هي عزة علي؟
عزة على أحمد مواليد ام درمان المراحل التعليمية الأساس الشيخ أبوزيد الثانوي ابوقصيصة
بكالريوس الإذاعة والتلفزيون أكاديمية السودان لعلوم الاتصال
* متي كان اول ظهور علي التلفزيون ؟
اول ظهور تلفزيوني كان عبر قناة النيل الأزرق برنامج الأرض الطيبة مجلة زراعية ومن بعد برنامج بالبلدي بتكلم عن العادات والتقاليد والموروثات السودانية
* هل مارستي نشاط إعلامي داخل الجامعة ؟
نعم الجامعة كانت هي الدافع الأكبر في مجال العمل الإعلامي شاركت في إذاعة الجامعة أعددت كثير من البرامج الإذاعية وأيضا كتبت نص درامي وشاركت كمصورة وممثلة ومخرجة في الجامعه كان مشروع تخرجي عبارة عن دراما إذاعية اسميتها دموع فاطمة وهذا كان أول ظهور درامي وأيضا اول محاولة لكتابة الدراما وآخرها وبرنامج بصمة امرأة كان حوار شخصية مع دكتورة تابيتا بطرس الشخصية الاكتر من رائعة، ياسلااااام ايام ليها إيقاع
* أكتر شخص وقف معك وكان دائماً يشجعك علي ان تكوني مذيعة؟
أكثر شخص وقف معي…. الاستاذ المخرج دفع الله حامد و
أمي ثم أمي الغالية الحبيبة كانت دايما بتشجعني ودعواتها معي في كل خطوة
* كيف يتم اعداد البرنامج والتحضير ليه؟
كنت بقعد مع معد البرنامج الأستاذ دفع الله وبنحضر للبرنامج الان عندي دفتر كبير فيه كل فقرات بالبلدي وأسماء الضيوف واكتر فقرة كانت مميزة اسمها ضي الرتينة هي عبارة عن حكاية من الأساطير السودانية القديمة مثل فاطمة السمحة وغيرها من الحكاوي
بعد بالبلدي اشتغلت العديد من البرامج برنامج مناخ سوداني هو برنامج بعكس الأماكن السياحية في السودان وأيضا برنامج دفتر حضور بنوثق فيه لشخصيات سودانية في مجالات مختلفة
*برنامج بالبلدي من البرامج التي صنعت اسمك من اين اتت الفكرة؟
بالبلدي فكرة المخرج دفع الله حامد اشتغلنا مع بعض برنامج لوزارة الزراعة الأرض الطيبة وعرض على الفكرة برنامج تراثي بهتم بالعادات والتقاليد السودانية والأمثال والكناتيش والإرث السوداني انا وافقت والحمد لله ربنا وفقنا من ثاني حلقة البرنامج نال جائزة ذهبية في مسابقة مونديال القاهرة والجائزة كانت الدافع الأكبر اشتغلنا مع الحكامات وكل من يهتم بالتراث السوداني البرنامج لقى صدى واسع وخصوصا في ولايات السودان المختلفة
*ظهرتي بالزي السوداني الحبيب ومناطق تراثية حدثينا عنها واشخاص لهم اثر في البرنامج؟
الأزياء كانت من مركز الموسيقى التقليدية الأستاذ دفع الله الحاج كان مرجع اساسي في الأغنية التراثية وأيضا كان عنده فقرة في برنامج بالبلدي عن الايقاعات السودانية هو استاذ باحث ومهتم بالتراث السوداني وقدم كتير للموروثات السودانية مغني مجيد بكل اللهجات السودانية شارك في العديد من المحافل داخل وخارج الوطن مثل السودان وكان سفير للتراث السوداني
نزار الفاتح صاحب حديقة امي الغالية جوار كبري الحلفايا الحديقة كانت استديو اساسي للبرنامج كان بستضيفنا بصدر رحب مكان تراثي جميل عبارة عن سودان صغير في حوش امي الغالية بالجد أماكن في القلب (حديقة امي الغالية) من أجمل الأماكن وأول استديو بالبلدي من تصميم صاحب المكان نزار الفاتح ربنا يطراه بالخير من الشباب المهتمين بالتراث
وأيضا من أبرز الأسماء والشخصيات الشاعر القومي عبدالله و إدريس وحكامات التراث.
*من الشخوص في برنامجك د.عبد المطلب الفحل له الرحمة كيف كان التعامل بينكم؟
ربنا يرحمه ويحسن إليه بالجد كان إضافة لي وللبرنامج وكنت محظوظة لأنه كان استاذي في الجامعة درسني اللغة العربية وأيضا في تجربة القيد الصحفي هو من فطاحلة الإعلام السوداني انسان طيب وبسيط كريم وبشوش استقبلنا في بيته بصدر رحب وكان بالجد إضافة حقيقية ربنا يرحمه ويحسن إليه واحر التعازي لاسرته الكريمة
كان بقدم لينا فقرة ثابتة في بالبلدي عن معاني الأمثال السودانية وهو خبير في الأمثال والتراث السوداني باحث ومرجع فقد عظيم والله..
* الإعلام بالنسبة لك هواية أم موهبة ام دراسة؟
مابين الهواية والموهبة كانت أكاديمية السودان هي الاختصرت على مشوار طويل لأنه من اول سنة كنا بندرس عملي ونظري عبر إذاعة الأكاديمية والتحايا لكل الزملاء الأن كتير منهم في مجالات الإعلام المختلفة داخل وخارج الوطن أسماء لامعة لأنهم وجدو بيئة دراسية خصبة
بالبلدي يحلق بك في اروع مناطق السودان التراثية.
*هل البيئة كان لها تاثير في برنامج بالبلدي وهل كنتي تجدي متعة وانت بالزي الفلكوري وانتي تجوبي مدن السودان وتمتعي المشاهد بارث وثقافات السودان المختلفة؟
انا اتولدت واتربيت هنا ماكان عندي خلفية كافية عن التراث بحثت وقريت كتب واستفدت من طبقات ود ضيف الله وضيوف برنامج بالبلدي كنت مبسوطة بالزي الفلكلوري لأنه احساس بالقومية السودانية السودان جميل وانسانه طيب في تشابه كبير بين العادات والتقاليد والإنسان السوداني في كل مكان كريم…
بعشق السفر ولي زكريات جميلة بتمنى أزور كل السودان شرق وغرب شمال وجنوب
وفي برنامج مناخ سوداني بتمنى نعكس من خلاله جمال السودان انسان وبيئة وكانت السبلوقة حاضرة في حلقة من حلقات البرنامج وأيضا عكسنا جمال النيل مع الشاعر القومي الراحل المقيم سعد ود النصيح من أجمل حلقات مناخ سوداني وكانت حلقة وداع..
* الصعوبات التي واجهتك في البداية؟
الحياة كلها عبارة عن صعوبات هي ملح الحياة هي الدافع للنجاح
*علاقتك بالرياضة؟
علاقتي بالرياضة
بحب اللعبة الحلوة بتمنى اسم السودان مرفوع بين الدول علم يرفرف
*شخصيات استضفتيها في برنامج بالبلدي عالقة بالذاكرة؟
كل شخصيات وضيوف بالبلدي عالقين بالذاكرة شعراء فنانين وحكامات باحثين في التراث السوداني لأنهم بالجد اضافة..
محبة الجمهور
بتعني لي الكتير محبة الناس من محبة ربنا لي مبسوطة بي كل الناس البتحبني بنبسط جدا لم زول اسألني عن حاجه في التراث أو عن معنى مثل…
*الرؤى المستقبلية؟
كتير من البرامج والأحلام
اما عن الرؤى المستقبلية في أفكار حلوة لمناخ سوداني لأنه برنامج بعكس وجه السودان السياحي ودا جانب مهم بأثر في اقتصاد البلد وماف أجمل من السودان ياريت كلنا كسودانيين ندي السودان حقه البستاهلو من حب ووطنية محتاجين بالجد نحب بلدنا
وبتمنى الاستقرار للبلد والرخاء والنماء…
