_ لما قلنا لوزيرة الشباب والرياضة هنادي صديق.. أين وعدك وقد قلتي سيبدأ عهدك بتكملة المسيرة التي بدأها الوزير صلاح.. و تسألت عن ذلك الوعد.. لم نكن (نرمي الودع) أو نرجم بالغيب. _ أصدر مجلس إدارة الاتحاد خارطة للطريق.. نفذنا الخارطة (بطيب خاطر).. ناءَ سوداكال جانباً (و ركز في شغل الثلاث ورقات و استجلاب العضوية!!. ). و بالنتيجة. أقمنا جمعيتنا في الرابع من سبتمبر.. بحضور المفوضية و الاتحاد و اللجنة الأولمبية.. شهودا و مراقبين.. (منتهى الشفافية). _ باركت اللجنة الثلاثية و رفعت الأمر (للعلم).. لأن الفيفا.. اصلا مهتمه.. و(داخلة في الصورة). اجتمع مجلس الإتحاد و أجاز تقرير اللجنة الثلاثية. _ إذن الرابع من سبتمبر (لافيها شق و لا طق). الرابع من سبتمبر بتاعت الهايد بارك الموردة (مش بتاعت وضع اليد)!!. _ (وضع اليد ده.. ينفع في الحيازات و معسكرات النازخين لكن في المريخ.. صعبة شوية!!). (المريخ ملك و سلك). (ما.. سلك بابكر.. سلك عديل كده.). _ بالمناسبة.. _( بعد ده كلو.. ناس نمر.. يتلولو... !!). ( ما صلاح نمر.. نمر الوالي البيحب الجرجرة ده و الخائف من الفيفا ده ). _ و هو.. مالو ؟! هو... قال : (عشان الفيفا ما تعتبر اي خطوة من الولاية. تقوم تدخل.. و تجمد السودان !!. يا.. جماعة انتو فاكرين الفيفا دي حيوان ما بيفكر؟!. فاكرنها عبيطه و لا نافشه شعرها؟!. _ الفيفا دي (بالمناسبة ) منظمة عالمية محترمة جداً ( اقسووم بالله). _( ما عارف نمر... ليه معتبر الفيفا دي (قونة) فاردة (كلوشها) و بتاعت ردحي.. و شرانية؟!!). _ بالمناسبة الفيفا بالكلامها بتاع أمس ده.. وجهت صفعة لحكومة السودان ذاتها!!. _ حكومة عاجزة عن تنفيذ قرارات الوزراء..(الوزير صلاح بدوي نموذجاً) حكومة تستحق أكثر من صفعة. _ حكومة عينها في الاتحاد عاجز يطبق قرارته.. و تتفرج!!!! . _ حكومة عينها في الاستقطاب و الفهلوة.. و لا كأنها هنا. _ حكومة اخير عدمها..!!. _ مشكلتنا مع الحكومة إنها بتاخد المعلومات المهمة عن طريق المشافهة!!. فلان قال.. شداد هدد.. عكرمة سوا.. لما جاءت فاطنه السمحة.. وورتكم عيوب المشافهة وعدم منطقية (شغل المشاطات).. بتاع قلنا و قالوا _ العلاقات مع المنظمات الدولية.. يحكمها القانون (مش قالوا و قلنا). _ اخونا نصر الدين الشريفي.. أطلق على لقب فيفا..؟... كما ما يقابلني يقول لي ( اووو فيفا) مش عشان حاجة.. غير انو مرة في تسجيل موجه.. للمريخاب.. قلت فيه : (شنو اي زول شابكنا الفيفا قالت الفيفا سوت هي الفيفا دي بتجي للناس دي في النوم ولا شنو؟!.. ) . _ صدر قرار من الاتحاد.. و عجز عن تنفيذه لانو في (زول) عندو رأي.. طوالي الحكومة تدخل.. و تقول للزول ده (يا ولدنا وضع اليد ده هناااك في العشوائي ). _ طبعا ما متوقع الحكومة يكون عندها منطق أكثر و أعمق من كده!!. يا ها... نتيجة ثقافة المشافهة و القونات و ال........ لا مافي داعي. نحن مبسوطين.. (ملنا ومال سيرة الناس). _ الأهم أن الفيفا.. لقنت الجماعة درس .. و الفيفا لأي زول. _ لما قلنا.. الذي لم يقبل بقرارات مجلس الإتحاد عليه بكأس. ما كانت (فسالة) ولا استغناء.. لكن ده القانون. ودي معلومة.. مشاعه و معروفة. والذي لا يعرف أن قرارات الاتحاد ملزمة و طاعتها واجبة.. يشوف ليه شغلة تانية!!. _ طبعا ما بقصد لجان الاتحاد.. أكان انضباط أو استئناف ديل عادي عندهم.. تخالف قرارات مجلس الإتحاد.. يطلعوا الاتحاد غلطان!! (المافي شنو ؟؟!! ) و هسه الدورة الجاية ينتخبوهم هم ذاتهم.. لأنهم خبراء في.. اللعب تحت التربيزة..!!. لا طبعا.. ما بقصدهم.. معقولة اقصد لي (حمام ميت). _ في الناس كده.. كانت مترقبة الفيفا.. تجي.. تعمل تطبيع.. قامت الفيفا.. قالت ليهم: (طبعوا مع المنطق الأول ده قرار مجلس الماعاجبو يمشي كأس الما ورها ناس). _ المريخ.. أول من انتصر.. لاهلية و ديمقراطية الحركة الرياضية.. في العدأيااااخ نحن كان عندنا قرار من المفوضية عديل كده.. وانا القدم الطعن.. لكني ذهبت للبروف شداد وقلت ليه.. نحن بنعلي من شان المنظومة الرياضية.. نحن عاوزين قرار منكم انتو في مجلس الإتحاد. يوميها شداد قال لي :(نحن ما بندخل في المريخ ده نادي مستقل). قلت ليه نحن لغاية ما نعمل نظامنا الأساسي.. ما تكلمنا عن استقلالية.. نحن في صراع وأزمة.. انتو مفروض تحلوها. انت كبير الأسرة الرياضية كلها.. يااااخ حلنا. و أبدا.. البروف كأنه.. ما كان هناك. _ وجاء مجلس إدارة الاتحاد و حلانا و أصدر قراراته ببطلان جمعية 2019.. ناس البروف حوروها إلى (تأكيد) و برضو مشينا لقدام تاني عملوا جمعية بتاعت الكورونا.. تاني مجلس الإتحاد ابطلها. الدرس المستفاد من ذلك :- ١/ سوداكال خبير في الجمعيات الضاربة. ٢/ مجلس إدارة الاتحاد واقع ليهم النضم ٣/ شداد أسير فكرة الاستقلالية.. بطريقة مدثرية خيرية.. _ يا جماعة الخير.. قلنا وكررنا.. انو تدخل الطرف الثالث يعني.. تدخله في القرارات.. يعني عادي ممكن تستعين بالشرطة و الحكومة ووزير الشباب والرياضة الخ الخ اهي الفيفا ذاتها قالت كده... امشوا غالطوها. و لما امشوا ليها بالله سلموا عليها السلاام أمانة... (أمانة الفيفا ما لطيفة). _ وزارة الشباب والرياضة ولاية الخرطوم.. أصدر وزيرها السابق صلاح البدوي قرارا.. بتسليم مقرات المريخ للمجلس الشرعي.. ( الوزيرة الجديدة.. كترت قللت.. نشوف الوزير الاتحادي!! ). _ بالمناسبة قوانين الرياضة في السودان.. (روكة) ساكت..!!. يعني ممكن لو هنادي ما جات في خط المريخ.. نقرل ليها ببساطة المريخ ذاتو بيلعب في الممتاز و ما تبع وزارتك. لو قالت انا عندي مفوضية التسجيل.. نقول ليها (خوتنا في مكانها ) فاهمني يعني قوانين.. ممكن عادي.. من فرط.. إنها ما فاهمة حاجة (لسه بتكلم عن القوانين).. ممكن.. تؤديها البحر و تجيبها عطشانة. الله يرفع السودان.. في مكانا يستحقه.. هذا الشعب الاسمر.. الطيب. _ لامعني في رأيي أن يكون النادي الذي يلعب في الممتاز.. تبع القانون الاتحادي.. ومسألة انو منافسة قومية.. ده ما مبرر يخلي جهة التسجيل (ودي ولائية) تفارق ناديها المميز.. المنافسة القومية تحكمها قوانين الاتحاد.. دي ما عاوزه اظن فيفا!!. تجي توقع ليكم الكلام. _ لما الفيفا (العالم المتحضر) اجتمع في زيوريخ السريسرية في عام 2005 وده كان بمناسبة انعقاد. كونغرس الفيفا الذي أجاز... حكاية ترخيص الأندية. _ بعدها بسنوات.. جلست الحكومة السودانية (العالم بتاع المشافهة و التنظير ) و عملوا في سنة 2016 و في سنة 2017 .. قانونين للشباب والرياضة.. واحد اتحادي وواحد ولائي!!. و يا كافي البلا القانونين الاثنين.. أو اتنيناتهم .. ماعندهم أدنى علاقة.. بالنظام القررتو الفيفا قبلهم بسنوات.. وبعد ده يخافوا من الفيفا!!. مفارقة عجيبة و شغل بتاع ناس ما عاقلين بس. _ نحتاج للكثير عشان نعملوا كلنا.. للبلد دي.. بس سلمونا مريخنا في الأول. _ يظن ناس صناعة الزيف.. ان قرارات الفيفا لصالحهم..!!. طبعا.. صعب جداً تقنع.. زول عندو (ظرف). الا يكون عندك (ظرف) تقدمو ليه بدل (الظرف) الاولاني. _ و قد آن الأوان.. عشان تبطل الحكومة البحلقة.. (و الدفاع بالنظر). ما ممكن تتفرج ساكت و آخر الشهر.. ياخدوا ماهية!!. _ استجلب سوداكال عضوية.. حققوا في الموضوع.. رفض تسليم المقرات.. حققوا في الموضوع. ماقدم ميزانيات.. أجر لبتاعين صعوط.. أسألوه ياخ.. ما ممكن تكون دي حكومة..!!. العزراوات خلو حكاية السكوت دي..!. _ و آن الأوان أن يحترم البروف شداد قرار مجلسه. _ الجودية في محل القانون.. حاجة ما بتشبه تاريخ شداد. _صدر قرار مجلس الإتحاد مفروض يحترم.. ما مفروض نعزل في القرارات.. ده نحترمو.. ده.. ما نشتغل بيه... عزيل و انتقاء... مافي.. العزيل ده في البطيخ!!. (في معلوم ولا مافي؟! ). _ ليس من حق سوداكال أن ينصب نفسه (مقيما) لقرارات الإتحاد. ما عاجبو.. يستأنف. _ بالمناسبة الفيفا طلعت.. قارئ جيد لكل ما يصلها من شكاوى و اعتراضات و غيره. بل و متابع جيد.. و بيرد على الناس و بيعبرهم.. تعرفوا طوال الحراك المريخي.. كتبنا.. وكتبت شخصيا للاتحاد و لجانه المختلف مئات المذكرات ولم يردوا على أي مذكرة إلى الآن!!. تعرفوا مرة طلبنا فتوى قانونية.. لم يردوا علينا..!!. _ سبحان الله ناس الفيفا.. حتى على الايميل يردوا عليك و فيديو كونفرس يسوا ليك.. و يا خونا الشااااي الشااااي بجاي ومعاه كيكة. _ بالجد.. ناس الفيفا متحضرين ما بتاعين مشافهة وحكي..!. قانون يعني قانون مافيش يمة ارحمنيني. _ أثناء لقاءتنا مع بروف شداد.. الكثيرة.. مرة قال لينا : ( انت اعمل ليكم شنو انا لا بوليس و لا نيابة). _ هسه الفيفا جاوبت على سؤال البروف.. غلبتك تخلي قرارات مجلسك محترمة استعين بالوزارة.. ده تصريح مرور. _ والوزارة عندها بوليس و نيابة واي حاجة.. هي الوزارة ح تغلب.. من تنفيذ إرادتها..؟!. _ غايتو نتيجة الفيديو كونفرس.. ذي صباح العيد. يعني بقى عندنا مجلس صباح الحب و قرارات فيفا وهي صباح عيد.. و الزهور صاحية و انت نائم. _ ناس صباح العيد لسه في يدهم ملفات مهمة.. فما على ناس صباح الحب (مجلس المريخ الشرعي ) إلا أن يعطوا تلك الملفات الاهتمام اللازم. والفبفا.. ملك لا يظلم عنده احد. كلمتكم بالكلام ده.. و كتبوا دشليون مرة. و قد كأن. _ سعدت بكونو الكندو و على أسد ح يترشحوا للاتحاد السوداني لكرة القدم.. مش لأنهم مريخاب.. لكنهم لانهم... هم برضو صباح خير.. _ بعد نتيجة صباح العيد.. تواصلت مع سعادة اللواء الدكتور عامر عبدالرحمن.. و شكرته من قلبي و طالبته.. ينقل تقديري لجميع أعضاء مجلس إدارة الاتحاد العام.. فإذا كانت الفيفا صباح عيد.. فاللواء الدكتور عامر و رفاقه في اللجنة الثلاثية الريس حسين ابوقبة و الريس عبدالرحيم الدلنج فهم العيد ذات نفسه. _ ولن انسى بالطبع البروف شداد.. رغم.. قسوتنا احيانا.. لكنه رجل.. بابه مفتوح.. دائما.. ذي باب الصباح.. مشرع.. بدون بواب يحاورك.. بالساعات يستمع إليك.. يسمع منك.. حتى لو جاء بالشرطة.. مع ذلك يسمح بلقاءك.. كما حدث مرة.. ذهبنا إليه.. وبعد شمطة.. مع الشرطة.. دخلنا عليه وكنت اول الداخلين فبادرته.. صائحاً: (تجيب لينا الشرطة)؟!. الجماعة المعاي شابكتي براحة براحة.. قلت ليهم مافي براحة. رد البروف صائحاً : اي بجيب الشرطة.. في رئيس اتحاد في الدنيا دي بيستقبل الجمهور..؟! قلت ليه.. نعمل ليك شنو... (بابك فاتح لينا).. _ و في عز غضبة رأيت شبح بسمة في فاه.. لم الحظها الا انا. مهما اغلظ شداد و اغلظنا عليه.. يظل رجل.. ذي شمس صباح.. ربما.. تحرقك.. تسخن معاك.. لكنها.. مهمة.. و ذات الق. ______________ # وعشت يا مريخ _ موفور القيم _ # لا للجودية _في موضع القانون # على وزارة الشباب و الرياضة أن تقوم بدورها سريعا _ لينقذ مجلس صباح الحب وعوده_ ونعيد سيرتها الأولى _ # تتحمل وزارة الشباب والرياضة ماجرى في استاد المريخ من دمار _ بتقاعسها عن دورها في الحفاظ على المال العام. # في كل دول العالم تتصدى الحكومة لفرض القانون _ دون أن تثور مشكلة_ الفيفا بتجمدنا. # كعب جمود الفهم _ والفهم قسم # والزعلان كلمو _ يقع الخزان. # كفاية _
