الأعمدة

نادوسيات نفاج الامل ناهد العطا ⭐لوله⭐

نادوسيات
نفاج الامل
ناهد العطا ⭐لوله⭐

الامل من الفرق التي تستأسد أمام المريخ مهما كان موقفها أو ترتيبها في روليت المنافسة وسيكون الفهود اسود أمام المريخ خاصة والفريق مهدد بالهبوط حيث يحتل المركز ال14 برصيد 33 نقطة وبالرغم من أنه يحتاج لنقطة فقط لكنه سيفعل الممكن وبعض المستحيل للفوز على سيد البلد وأسد على وأمام المدعوم نعامة…….

ولانها (نادوسيات) فكل مرة بحاول أدخال مفردات من ارثنا الثقافي وعاداتنا وتقاليدنا ولاني دارسة (اثار) وبحكم التجوال في مناطق السودان الأثرية اجد نفسي مع (القديم) والنسي لقديمه ضل …..

مره اتكلمت عن (الجالوص) ومع انو الكلام واضح إلا اني تابعت التعليقات وانا اضحك واسال ربي السلامة لوطني من اجل ثورة تعليم تزيح (غباشة) التفكير في المعني القريب وترك مابين السطور والفهم الاعمق….

ماعلينا الله يجازي الكان السبب….

نرجع لموضوعنا (نفاج) الامل وعشان نفتح النفاج خلونا نقول مريخنا يامالك زمام احساسنا ياطالع دوام ونازل مع انفاسنا املنا فيك كبير والفرح اكيد بجينا قريب……

النفاج لغير الناطقين بها دائماً بكون في (البيوتات) الكبيرة والبكون فيها كبير العيلة صاحب الكلمة والامر المطاع بيته بكون في النص وحوله بيوت كل العائلة وبين كل بيت وبيت (نفاج) فتحة في (الحائط) شبيه بالباب من دون بوابة لها (حرمتها) بس مواعيد (الوجبة) سريع الشباب بجو بيها من اول نداء للحضور والالتفات حول راس الاسرة…..

وياضلنا المرسوم علي رمل المسافة
وشاكي من طول الطريق
قول (للبنية) الخايفة من (نار) الحروف
تحرق (بيوتات) الفريق
قول ليها ما (تتخوفي) !!!
دي النسمة بتجيب (الامل)
والأمل بصبح رفيق
والاصلو في (الجوف) اندفن
لا بتنسي لا بتمحي لا بنتهي منو الحريق
ياضلنا

جمهور المريخ فاتح( نفاج) الامل والعشم في شفوت الزعيم رغم النقص والاصابات والمشاكل الإدارية
لا تقفلوا (النفاج)…..
ود النصري تغني (بالنفاج) منو القال اقفلوا (النفاج) قطع حبل الوداد والحن …..

اليوم يلعب الزعيم ضد الامل والهلال والحكام والإصابات والغيابات ولجنة المسابقات .

يلعب المريخ اليوم مباراة مع خصم ضعيف في الأداء والتكتيك والتجهيز قوي بوعود مابعد الفوز ويجب علي المريخ ان ينتصر ….

لن يتوقف هدير الصفوة الشفوت بالمدرجات ل90 دقيقة تشجيع حضاري مثالي….
الامل ليس ند للزعيم مع احترامي للامل ولكن اليوم من اجل تفادي الهبوط سيكون اسد

سيلعب المريخ اليوم وفي البال والخاطر احرف محترف مر علي المريخ (ايداهور ) والذي كانت أول واخر مباراة له ضد الامل عطبرة .

سيلعب اليوم المريخ وسنهدي الفوز لزوجة ايداهور وابنه الصغير.

فريق سيدات المريخ يحتاج لفريق ولي عودة للقطاع والفريق ….

هروب المدعوم من كأس المناسبات معلوم والعودة لخاطر عيون الجنجويد مجبور والكاس احمر دعماً للسلام…..

اللهم انصر المريخ

برضو بحبك يامريخ
برضو بحبك يانادوس

زولي الولوف

افتح مداخل روعتك
وخلي الامل في سكتك
لا تقفل (نفاج) الامل
وسوقني معاك في رحلتك
انا وانت والشوق والأمل
نتباري في الدرب الطويل
ونصل هناك لدنيتك ….
لا تقفل (النفاج )

ختاماً
انت الزعيم أصل الهوى وملك الملوك انت البطل

مقالات ذات صلة

زر الذهاب إلى الأعلى
error: Content is protected !!